ঈশ্বৰ
নিচিনো তোমাক ক’ত আছা প্ৰভু
আমি অতি সৰু ল’ৰা |
চিয়ঁৰি চিয়ঁৰি মাতিলে তোমাক
নামাত দুৰৈৰ পৰা ||
নাজানো তোমাক মিনতি কৰিব
আমি অতি সৰু ল’ৰা
আছানেকি প্ৰভু সৰগত তুমি
হই জোন বেলি তৰা ||
নুবুজোঁ তোমাৰ মৰমৰ মাত
আমি অতি সৰু ল’ৰা |
ৰিণিকি ৰিণিকি সুৰ এটি আহে
জানো ক’ৰবাৰ পৰা ||
তথাপি তোমাক ভালপাওঁ প্ৰভু
আমি অতি সৰু ল’ৰা |
তোমাৰ চেনেহ দয়াৰে আমাৰ
বুকুখনি থাকে ভৰা ||
নোৱাৰোঁ বুজিব তোমাৰ মহিমা
আমি অতি সৰু ল’ৰা |
বিলোৱা হিয়াত মৰম জেউতি
নিতে আতঁৰৰ পৰা ||
